•► ಕಝಾಕಿಸ್ತಾನ್ (in News) (Kazakhstan)

•►  ಕಝಾಕಿಸ್ತಾನ್  (in News)
(Kazakhstan)
━━━━━━━━━━━━━━━━━

▪️ಇದು ಬಹುಪಾಲು ಮಧ್ಯ ಏಷ್ಯಾದಲ್ಲಿ ನೆಲೆಗೊಂಡಿರುವ ಖಂಡಾಂತರ ದೇಶವಾಗಿದ್ದು, ಅದರ ಪಶ್ಚಿಮ ಭಾಗಗಳು ಪೂರ್ವ ಯುರೋಪ್‌ನಲ್ಲಿವೆ.

▪️ಇದು ರಷ್ಯಾ, ಚೀನಾ, ಕಿರ್ಗಿಸ್ತಾನ್, ಉಜ್ಬೇಕಿಸ್ತಾನ್, ತುರ್ಕಮೆನಿಸ್ತಾನ್ ಜೊತೆಗೆ ಗಡಿಗಳನ್ನು ಹಂಚಿಕೊಂಡಿದೆ ಮತ್ತು ಕ್ಯಾಸ್ಪಿಯನ್ ಸಮುದ್ರದ ಹೆಚ್ಚಿನ ಭಾಗವನ್ನು ಸಹ ಹೊಂದಿದೆ.

▪️ಇದು ಕೇವಲ 37 ಕಿಲೋಮೀಟರ್ ದೂರದಲ್ಲಿದ್ದರೂ ಮಂಗೋಲಿಯಾ ಗಡಿಯನ್ನು ಹೊಂದಿಲ್ಲ.

▪️KAZIND 2019 - ಭಾರತ ಮತ್ತು ಕಝಾಕಿಸ್ತಾನ್ ಸೇನೆಯ ನಡುವಿನ ವಾರ್ಷಿಕ ಮಿಲಿಟರಿ ಸಮರಾಭ್ಯಾಸ.

▪️ಅಧಿಕಾರದಿಂದ ಕೆಳಗಿಳಿದ ನಾಯಕ ನುರ್ ಸುಲ್ತಾನ್ ನಜರ್ಬಯೇವ್ ಅವರನ್ನು ಗೌರವಿಸಲು ಇದು ತನ್ನ ರಾಜಧಾನಿ ಅಸ್ತಾನಾವನ್ನು ನುರ್ ಸುಲ್ತಾನ್  ಎಂದು ಮರುನಾಮಕರಣ ಮಾಡಿದೆ.

▪️WTO ದ ಹನ್ನೆರಡನೇ ಮಂತ್ರಿಗಳ ಸಮ್ಮೇಳನವು (MC12) ಜೂನ್ 2020 ರಲ್ಲಿ ಕಝಾಕಿಸ್ತಾನ್‌ ನಿರ್ಧರಿತ - WTO ಪ್ರಕಾರ ಇದು 2021 ರ ಮಧ್ಯದಲ್ಲಿ ಅಥವಾ ಕೊನೆಯಲ್ಲಿ ನಡೆಯಬಹುದು.

ಐಎಎಸ್ ಸಿದ್ಧತೆಗೆ ಯಾವ ಕೋಚಿಂಗ್ ಸೂಕ್ತ? ಪ್ರಸ್ತುತ ಸನ್ನಿವೇಶದಲ್ಲಿ ಅನ್‍ಲೈನ್ ಕೋಚಿಂಗ್ ನ ಅಗತ್ಯತೆ (which coaching is important for ias preparation?)

★ ಐಎಎಸ್ ಸಿದ್ಧತೆಗೆ ಯಾವ ಕೋಚಿಂಗ್ ಸೂಕ್ತ? 

ಪ್ರಸ್ತುತ ಸನ್ನಿವೇಶದಲ್ಲಿ ಅನ್‍ಲೈನ್ ಕೋಚಿಂಗ್ ನ ಅಗತ್ಯತೆ :

(which coaching is important for ias preparation?)

ದೇಶದ ಕಠಿಣ ಪರೀಕ್ಷೆಗಳಲ್ಲಿ ಒಂದಾದ ಐಎಎಸ್ ಪರೀಕ್ಷೆಯಲ್ಲಿ ಯಶಸ್ವಿಯಾಗುವುದು ಬಹುದೊಡ್ಡ ಸವಾಲಿನ ಕೆಲಸ. ಪಾರಂಪರಿಕ ಸಿದ್ಧತೆಗಿಂತ ತಾಂತ್ರಿಕ ನೆರವಿನ ಸಿದ್ಧತೆ ಇಂದು ಹೆಚ್ಚು ಪರಿಣಾಮಕಾರಿಯಾಗಿದೆ. ಮಾಹಿತಿ ತಂತ್ರಜ್ಞಾನದ ಕ್ಷಿಪ್ರ ಬೆಳವಣಿಗೆಯಿಂದ ಬೆರಳ ತುದಿಯಲ್ಲಿಯೇ ಸಾಕಷ್ಟು ಸಂಪನ್ಮೂಲ ದೊರೆಯುತ್ತಿದೆ. ಇಂಟರ್‌ನೆಟ್‌ನ ಅನ್ವಯಿಕದೊಂದಿಗೆ ಸ್ಮಾರ್ಟ್‌ಫೋನ್, ಟ್ಯಾಬ್ಲೆಟ್, ಲ್ಯಾಪ್‌ಟಾಪ್ ಮತ್ತು ಕಂಪ್ಯೂಟರ್‌ನಂತಹ ಗ್ಯಾಜೆಟ್ ಬಳಕೆಯೊಂದಿಗೆ ಐಎಎಸ್ ತಯಾರಿ ಸುಲಭವಾಗಿದೆ. ಎಲ್ಲವೂ ಆನ್‌ಲೈನ್‌ನಲ್ಲಿ ಲಭ್ಯವಿರುವಾಗ ಐಎಎಸ್ ಕೋಚಿಂಗ್ ಅವಕಾಶವನ್ನು ಆನ್‌ಲೈನ್ ಮೂಲಕವೂ ಪಡೆಯಬಹುದಾಗಿದೆ.

ಕೋಚಿಂಗ್ ಅಗತ್ಯವೇ?

ಐಎಎಸ್ ಸಿದ್ಧತೆಗೆ ಸಂಪನ್ಮೂಲಗಳ ಅಗತ್ಯವಿದೆ. ಆಫ್‌ಲೈನ್ ಮತ್ತು ಆನ್‌ಲೈನ್‌ನಲ್ಲಿ ಸಾಕಷ್ಟು ಸಂಪನ್ಮೂಲ ಲಭ್ಯವಿರುವಾಗ ಕೋಚಿಂಗ್ ಅಗತ್ಯವೇ ಎಂಬ ಪ್ರಶ್ನೆ ಮೂಡದಿರದು. ‘ಅತಿಯಾದರೆ ಅಮೃತವೂ ವಿಷ’ ಎಂಬಂತೆ ಯಾವ ಮಾಹಿತಿಯನ್ನು ಓದಬೇಕು? ಹೇಗೆ ಓದಬೇಕು? ಯಾವುದಕ್ಕೆ ಎಷ್ಟು ಪ್ರಾಶಸ್ತ್ಯ ಕೊಡಬೇಕು? ಸಂಪನ್ಮೂಲಗಳ ನಿರ್ವಹಣೆ ಹೇಗಿರಬೇಕು? ದೌರ್ಬಲ್ಯಗಳನ್ನು ಮೆಟ್ಟಿ ನಿಲ್ಲುವ ಮಾರ್ಗಗಳಾವುವು? ಎಂಬಿತ್ಯಾದಿ ಅಂಶಗಳತ್ತ ಗಮನ ಹರಿಸಲು ಕೋಚಿಂಗ್ ಅನಿವಾರ್ಯ.

ಆನ್‌ಲೈನ್ ಕೋಚಿಂಗ್: ಕೋವಿಡ್‌ನಂತಹ ವಿಷಮ ಪರಿಸ್ಥಿತಿಯಲ್ಲಿ ಆನ್‌ಲೈನ್ ಕೋಚಿಂಗ್ ಅನಿವಾರ್ಯವಾಗುತ್ತಿದೆ. ಐಎಎಸ್ ಸಿದ್ಧತೆಗೂ ಆನ್‌ಲೈನ್ ಮಾದರಿಗಳು ಲಭ್ಯವಿದ್ದು, ಉತ್ತಮ ಅಧ್ಯಯನ ಸಾಮಗ್ರಿಗಳನ್ನು ಒದಗಿಸುತ್ತದೆ. ಆಡಿಯೊ-ವಿಡಿಯೊ ರೂಪದಲ್ಲಿರುವ ಸಾಮಗ್ರಿಗಳು ಹೆಚ್ಚು ಪರಿಣಾಮಕಾರಿ ಕಲಿಕೆಗೆ ನಿರ್ಣಾಯಕ ಪಾತ್ರ ವಹಿಸಿವೆ. ಮನೆಯಲ್ಲಿಯೇ ಸುರಕ್ಷಿತವಾಗಿದ್ದು ಕಲಿಯಲು ಆಸಕ್ತಿ ಇರುವ ಆಕಾಂಕ್ಷಿಗಳಿಗೆ ಆನ್‌ಲೈನ್ ತರಬೇತಿ ಉತ್ತಮ ವೇದಿಕೆ.

ಅನುಕೂಲಗಳು

ಐಎಎಸ್ ಸಿದ್ಧತೆಗೆ ಆನ್‌ಲೈನ್ ಕೋಚಿಂಗ್ ವಿಭಿನ್ನ ಅನುಕೂಲತೆಗಳನ್ನು ಒದಗಿಸುತ್ತದೆ. ಆಕಾಂಕ್ಷಿಗಳಲ್ಲಿ ಸ್ವ-ಅಧ್ಯಯನ ತಂತ್ರಗಾರಿಕೆಯನ್ನು ವೃದ್ಧಿಸುತ್ತದೆ. ಸ್ವ-ಅಧ್ಯಯನವು ಪರಿಣಾಮಕಾರಿ ಕಲಿಕಾ ತಂತ್ರವಾಗಿದ್ದು, ಕಲಿಕಾರ್ಥಿಗಳು ತಮ್ಮ ಸಾಮರ್ಥ್ಯ ಮತ್ತು ದೌರ್ಬಲ್ಯಗಳನ್ನು ಗುರುತಿಸಲು ಆನ್‌ಲೈನ್ ಕೋಚಿಂಗ್ ನೆರವಾಗುತ್ತದೆ. ಆನ್‌ಲೈನ್ ಕೋಚಿಂಗ್‌ನಲ್ಲಿ ದೌರ್ಬಲ್ಯಗಳಿಗೆ ಸೂಕ್ತ ಮಾರ್ಗೋಪಾಯ ಸೂಚಿಸುವ ಮೂಲಕ ವೇಗವರ್ಧಕಗಳನ್ನಾಗಿ ಮಾಡಲಾಗುತ್ತದೆ.

ಆನ್‌ಲೈನ್ ಕೋಚಿಂಗ್‌ನಿಂದ ಅಧ್ಯಯನ ಸಾಮಗ್ರಿಗಳ ಕೊರತೆ ಬಾಧಿಸುವುದಿಲ್ಲ. ತಜ್ಞರಿಂದ ರೂಪಿಸಲ್ಪಟ್ಟ ಗುಣಮಟ್ಟದ ಅಧ್ಯಯನ ಸಾಮಗ್ರಿಗಳನ್ನು ಕೋಚಿಂಗ್ ಸಂಸ್ಥೆಗಳು ಸಾಕಷ್ಟು ಮುಂಚಿತವಾಗಿ ನೀಡುವ ಮೂಲಕ ಸಾಮಗ್ರಿ ಕೊರತೆ ನೀಗಿಸುತ್ತವೆ.

ಅನುಕೂಲಕರ ಸಮಯದಲ್ಲಿ ಕಲಿಯಲು ಅವಕಾಶ ಹೆಚ್ಚಿರುತ್ತದೆ. ಆನ್‌ಲೈನ್ ಕೋಚಿಂಗ್ ಮೂಲಕ ನೀಡುವ ಬಹುತೇಕ ಪಾಠಗಳು ಪ್ರಿ-ರೆಕಾರ್ಡೆಡ್ ವಿಡಿಯೊಗಳಾದ್ದರಿಂದ ಕಲಿಕಾರ್ಥಿಯು ತನಗೆ ಅನುಕೂಲವಾದ ಸಮಯದಲ್ಲಿ, ಅನುಕೂಲವಾದ ಸ್ಥಳದಲ್ಲಿ ಕುಳಿತು ಕಲಿಯಲು ಸ್ವಾತಂತ್ರ್ಯ ಇರುತ್ತದೆ.

 ಕೋಚಿಂಗ್ ಸೆಂಟರ್ ಮತ್ತು ಮೆಸ್‌ಗಳಿಗಾಗಿ ಪರದಾಡಬೇಕಾದ ಅಗತ್ಯ ಇರುವುದಿಲ್ಲ. ಮನೆಯಲ್ಲಿಯೇ ಸುರಕ್ಷಿತವಾಗಿದ್ದು, ಮನೆ ಆಹಾರದ ಸವಿಯೊಂದಿಗೆ ಕೋಚಿಂಗ್ ಪಡೆಯುವ ಅವಕಾಶ. ದಿವ್ಯಾಂಗ ಚೇತನರಿಗೆ ಆನ್‌ಲೈನ್ ಕೋಚಿಂಗ್ ಅತ್ಯುಪಯುಕ್ತವಾದುದು.

 ಸಂಕೀರ್ಣ ಪರಿಕಲ್ಪನೆಗಳನ್ನು ಸುಲಭವಾಗಿ ಪರಿಹರಿಸುವ ತಂತ್ರಗಾರಿಕೆ ಇರುತ್ತದೆ. ಅನುಭವಿ ಬೋಧಕರ ವಿಷಯ ನಿರೂಪಣೆ ಜೊತೆಗೆ ಅನುಮಾನ ಮತ್ತು ಪ್ರಶ್ನೆಗಳನ್ನು ತಜ್ಞರೊಂದಿಗೆ ಕೇಳಿ ಪರಿಹರಿಸಿಕೊಳ್ಳುವ ಅವಕಾಶ ಇರುತ್ತದೆ. ಅಗತ್ಯ ಎನಿಸಿದರೆ ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ತರಬೇತುದಾರರಿಂದ ಕೋಚಿಂಗ್ ನೀಡಲಾಗುತ್ತದೆ.

 ನಿಗದಿತ ಹಾಗೂ ನಿರ್ದಿಷ್ಟವಾದ ಅಧ್ಯಯನ ಸಾಮಗ್ರಿಗಳು ಲಭ್ಯವಾಗುವುದರಿಂದ ಅಧ್ಯಯನ ಸಾಮಗ್ರಿಗಳಿಗಾಗಿ ಹುಡುಕಾಡುವ ಶ್ರಮ ತಪ್ಪುತ್ತದೆ. ಐಎಎಸ್ ಸಿದ್ಧತೆಗೆ ಸಾಕಷ್ಟು ಮಾಹಿತಿ ದೊರೆಯುತ್ತಿದೆ. ಆದರೆ ಆನ್‌ಲೈನ್ ಕೋಚಿಂಗ್‌ನಲ್ಲಿ ಪರೀಕ್ಷಾ ಪಠ್ಯಕ್ರಮ ಕೇಂದ್ರಿತ ಅಧ್ಯಯನ ಸಾಮಗ್ರಿಗಳನ್ನು ಮಾತ್ರ ಒದಗಿಸುವುದರಿಂದ ಅಧ್ಯಯನದ ದಿಕ್ಕು ಗುರಿಯತ್ತ ಸಾಗುತ್ತದೆ.

ಪಠ್ಯಕ್ರಮ ಬದಲಾದಂತೆಲ್ಲಾ ಆನ್‌ಲೈನ್ ತರಬೇತಿಯೂ ಸಹ ನವೀಕೃತಗೊಳ್ಳುತ್ತದೆ. ನೀವು ಬಳಸುವ ಗ್ಯಾಜೆಟ್‌ಗಳಲ್ಲೇ ಮಾಹಿತಿಯನ್ನು ಅಪ್‌ಡೇಟ್ ಮಾಡಲಾಗುತ್ತದೆ. ಹಾಗಾಗಿ ಅಪ್‌ಡೇಟ್ ಮಾಹಿತಿಗಾಗಿ ಹುಡುಕುವ ಶ್ರಮ ತಪ್ಪುತ್ತದೆ.

 ಆನ್‌ಲೈನ್ ಕೋಚಿಂಗ್‌ನಲ್ಲಿ ನಿಮ್ಮ ಬರಹ ಶೈಲಿಯನ್ನು ತೀಕ್ಷ್ಣಗೊಳಿಸಲಾಗುತ್ತದೆ. ಕಾಲಕಾಲಕ್ಕೆ ನಿಮ್ಮ ಬರವಣಿಗೆ ಶೈಲಿಯನ್ನು ಗಮನಿಸಿ, ವಿಶ್ಲೇಷಿಸಿ, ಸೂಕ್ತ ಮಾರ್ಗದರ್ಶನದೊಂದಿಗೆ ಬರವಣಿಗೆಯನ್ನು ತಿದ್ದಲಾಗುತ್ತದೆ. ಪರೀಕ್ಷಾ ದೃಷ್ಟಿಯಿಂದ ಬರವಣಿಗೆಯಲ್ಲಿ ಆಗಬೇಕಾದ ಮಾರ್ಪಾಡುಗಳ ಬಗ್ಗೆ ಸಲಹೆ ನೀಡಲಾಗುತ್ತದೆ.

ಆನ್‌ಲೈನ್ ಕೋಚಿಂಗ್‌ನ ಪ್ರಮುಖ ಲಾಭವೆಂದರೆ ಇನ್ನಿತರೇ ಕೆಲಸ ಅಥವಾ ಇನ್ನಿತರೇ ಕೋರ್ಸ್‌ಗಳ ಅಧ್ಯಯನದ ಜೊತೆಜೊತೆಗೆ ಐಎಎಸ್‌ಗೆ ಕೋಚಿಂಗ್ ಪಡೆಯಬಹುದು.

ಯಾವುದು ಸೂಕ್ತ?

ಆನ್‌ಲೈನ್ ಕೋಚಿಂಗ್ ನೀಡಲು ಹಲವಾರು ಸಂಸ್ಥೆಗಳಿವೆ. ಅದರಲ್ಲಿ ಯಾವುದು ಸೂಕ್ತ ಎಂಬ ಪ್ರಶ್ನೆ ಉದ್ಭವಿಸುತ್ತದೆ. ಪ್ರತಿಯೊಂದು ಸಂಸ್ಥೆಯು ವಿಭಿನ್ನವಾದ ತಂತ್ರಗಾರಿಕೆಯನ್ನು ಅಳವಡಿಸಿಕೊಂಡಿರುತ್ತದೆ. ಅಲ್ಲದೇ ಪ್ರತಿ ಸಂಸ್ಥೆಯ ಅಧ್ಯಯನ ಸಾಮಗ್ರಿ ವಿಭಿನ್ನವಾಗಿರುತ್ತದೆ. ಆಯ್ಕೆ ವಿಷಯಕ್ಕೆ ಬಂದಾಗ ನಿಮಗೆ ಅನುಕೂಲವಾಗುವ ಸಂಸ್ಥೆಯ ಡೆಮೋ ಕ್ಲಾಸ್ ಮತ್ತು ಅಧ್ಯಯನ ಸಾಮಗ್ರಿಗಳನ್ನು ವೀಕ್ಷಿಸಿ. ಸಾಧ್ಯವಾದರೆ ಹಿರಿಯ ಪರೀಕ್ಷಾರ್ಥಿಗಳ ಸಲಹೆ ಪಡೆಯಿರಿ. ಪೂರ್ವಗ್ರಹಗಳಿಗೆ ಒಳಗಾಗದೇ ಸಂಸ್ಥೆಯನ್ನು ಆಯ್ಕೆ ಮಾಡಿಕೊಳ್ಳುವ ಹೊಣೆಗಾರಿಕೆ ನಿಮ್ಮದು. ನಿಮ್ಮ ಆದ್ಯತೆಗೆ ಅನುಕೂಲವಾಗುವ ಕೋಚಿಂಗ್ ಸಂಸ್ಥೆಯನ್ನು ಆಯ್ಕೆ ಮಾಡಿಕೊಳ್ಳಿ.

(Courtesy : Prajawani newspaper)

•► ಸ್ಪರ್ಧಾತ್ಮಕ ಪರೀಕ್ಷೆಗೆ 'ಭಾರತದ ಸಂವಿಧಾನ'ದ ಅಧ್ಯಯನ ಹೇಗಿರಬೇಕು? (What should be the study of 'Constitution of India' for competitive examination?)

 •► ಸ್ಪರ್ಧಾತ್ಮಕ ಪರೀಕ್ಷೆಗೆ 'ಭಾರತದ ಸಂವಿಧಾನ'ದ ಅಧ್ಯಯನ ಹೇಗಿರಬೇಕು?
(What should be the study of 'Constitution of India' for competitive examination?)
━━━━━━━━━━━━━━━━━━━━━━━━━━━━━━━━━━━━━━━━━━
★ ಭಾರತದ ಸಂವಿಧಾನ
('Constitution of India)


ಯಾವುದೇ ಸ್ಪರ್ಧಾತ್ಮಕ ಪರೀಕ್ಷೆಯಾಗಿರಲಿ, ಅದರಲ್ಲಿ ಭಾರತದ ಸಂವಿಧಾನ ಕುರಿತಾದ ಪ್ರಶ್ನೆಗಳು ಕಡ್ಡಾಯವಾಗಿ ಬಂದೇ ಬರುತ್ತವೆ. ಹೀಗಾಗಿ ಇದರ ಸೂಕ್ತ ಅಧ್ಯಯನ ಅಗತ್ಯ.

ನಮ್ಮ ಸಂವಿಧಾನ ನಮ್ಮ ದೇಶದ ಸರ್ವಶ್ರೇಷ್ಠ ಕಾನೂನು. ಹೀಗಾಗಿ, ಸರ್ಕಾರಿ ಹುದ್ದೆಯಲ್ಲಿರುವ ಎಲ್ಲರಿಗೂ ಸಂವಿಧಾನದ ಅರಿವು ಇರಬೇಕು ಎಂಬುದು ಅಪೇಕ್ಷಿತ. ಅದರಲ್ಲೂ ಐಎಎಸ್, ಕೆಎಎಸ್, ಪಿಎಸ್ಐ, ಎಫ್‌ಡಿಎ ಮುಂತಾದ ಸ್ಪರ್ಧಾತ್ಮಕ ಪರೀಕ್ಷೆಗಳ ಮೂಲಕ ಜವಾಬ್ದಾರಿಯುತ ಹುದ್ದೆಗಳನ್ನು ಹೊಂದುವವರಿಗೆ ಸಂವಿಧಾನದ ಪರಿಜ್ಞಾನ ಅನಿವಾರ್ಯ.

ಈ ನಿಟ್ಟಿನಲ್ಲಿ, ಯಾವುದೇ ಹುದ್ದೆಯ ನೇಮಕಾತಿಗೆ ಸ್ಪರ್ಧಾತ್ಮಕ ಪರೀಕ್ಷೆಯಾಗಿರಲಿ ಅದರಲ್ಲಿ ಭಾರತದ ಸಂವಿಧಾನ ಕುರಿತಾದ ಪ್ರಶ್ನೆಗಳು ಕಡ್ಡಾಯವಾಗಿ ಬಂದೇ ಬರುತ್ತವೆ. ಅದರಲ್ಲೂ 2011 ರಿಂದ ಇಲ್ಲಿಯವರೆಗಿನ ಸ್ಪರ್ಧಾತ್ಮಕ ಪರೀಕ್ಷೆಗಳ ಪ್ರಶ್ನೆಪತ್ರಿಕೆಗಳನ್ನು ಗಮನಿಸಿದರೆ ಶೇ 8 ರಿಂದ ಶೇ 21 ರಷ್ಟು ಪ್ರಶ್ನೆಗಳು ಭಾರತದ ಸಂವಿಧಾನಕ್ಕೆ ಸಂಬಂಧಿಸಿ ಬಂದಿರುವುದನ್ನು ನಾವು ಗಮನಿಸಬಹುದು.

ಭಾರತೀಯ ಸಂವಿಧಾನದಲ್ಲಿ ಏನು ಓದಬೇಕು?
ಸಂವಿಧಾನದ ಐತಿಹಾಸಿಕ ಹಿನ್ನೆಲೆ (ಈಸ್ಟ್ ಇಂಡಿಯಾ ಕಂಪನಿ ಕಾಯ್ದೆಗಳು: 1700 ರಿಂದ 1857 ರವರೆಗೆ ಹಾಗೂ ಬ್ರಿಟಿಷ್- ಭಾರತ ಸರ್ಕಾರದ ಕಾಯ್ದೆಗಳು: 1858 ರಿಂದ 1947 ರವರೆಗೆ- 1935 ರ ಬ್ರಿಟಿಷ್- ಭಾರತ ಸರ್ಕಾರದ ಕಾಯ್ದೆಗೆ ಆದ್ಯತೆ ಅಗತ್ಯ), ಸಂವಿಧಾನದ ಆಕರಗಳು (60 ದೇಶದ ಎರವಲುಗಳು), ಪ್ರಸ್ತಾವನೆ, ಮೂಲಭೂತ ಹಕ್ಕು ಮತ್ತು ಕರ್ತವ್ಯಗಳು, ರಾಜ್ಯ ನೀತಿ ನಿರ್ದೇಶಕ ತತ್ವಗಳು, ಕಾರ್ಯಾಂಗ, ಶಾಸಕಾಂಗ, ಸಾಂವಿಧಾನಿಕ ಸ್ವತಂತ್ರ ಸಂಸ್ಥೆಗಳು (ಉದಾ: ಚುನಾವಣಾ ಆಯೋಗ, ನೀತಿ ಆಯೋಗ, ಇತ್ಯಾದಿ...), ಕೇಂದ್ರ- ರಾಜ್ಯಗಳ ಸಂಬಂಧ, ಸಂವಿಧಾನದ ಪ್ರಮುಖ ತಿದ್ದುಪಡಿಗಳು, ಪಂಚಾಯತ ರಾಜ್ ವ್ಯವಸ್ಥೆ, ಆಡಳಿತ ವಿಕೇಂದ್ರೀಕರಣ (73 ಮತ್ತು 74 ನೇ ತಿದ್ದುಪಡಿ ಅತ್ಯಂತ ಮುಖ್ಯ), ಸಂವಿಧಾನ ಮತ್ತು ರಾಜಕೀಯಕ್ಕೆ ಸಂಬಂಧಿಸಿದ ಪ್ರಚಲಿತ ವಿದ್ಯಮಾನಗಳು (ಉದಾ: 371 ನೇ ವಿಧಿ, ಒಂದು ದೇಶ ಒಂದು ಚುನಾವಣೆ, ಚುನಾವಣಾ ಸುಧಾರಣಾ ಕ್ರಮಗಳು, ಮೀಸಲಾತಿ ಹೋರಾಟ ಮತ್ತು ತೀರ್ಪುಗಳು, ಇತ್ಯಾದಿ...) ಇವೆಲ್ಲವುಗಳಿಗೆ ಆದ್ಯತೆ ನೀಡಬೇಕು.

ಟಿಪ್ಪಣಿ ಮೂಲಕ ಪರಿಕಲ್ಪನೆಗಳನ್ನು ಸಂಬಂಧೀಕರಿಸಿ:  ಭಾರತೀಯ ಸಂವಿಧಾನ ವಿಷಯವನ್ನು ಓದುವಾಗ ನಿಮ್ಮದೇ ಆದ ಟಿಪ್ಪಣಿ ಮಾಡಿಕೊಳ್ಳಬೇಕು. ಆಯಾ ವಿಧಿಗಳು, ಪರಿಚ್ಛೇದಗಳಲ್ಲಿನ ಹೋಲಿಕೆ ಮತ್ತು ವ್ಯತ್ಯಾಸಗಳನ್ನು ಸಹಸಂಬಂಧೀಕರಿಸಿ ನೆನಪಿನಲ್ಲಿ ಇಟ್ಟುಕೊಳ್ಳಬೇಕು.

ಇಂಗ್ಲಿಷ್ ಪದಗಳ ಬಳಕೆ ಅನಿವಾರ್ಯ: ಸಂವಿಧಾನದಲ್ಲಿ ಬಳಕೆಯಾಗಿರುವ ಕೆಲ ಇಂಗ್ಲಿಷ್ ಪದಗಳ ಯತಾರ್ಥ ಕನ್ನಡೀಕರಣ ಸಾಧ್ಯವಿಲ್ಲ. ಉದಾಹರಣೆಗೆ: ರಾಷ್ಟ್ರಪತಿಗಳ ಅಧಿಕಾರಕ್ಕೆ ಸಂಬಂಧಿಸಿ ಬಳಕೆಯಾಗಿರುವ ‘Pocket VISA’ ಪದವನ್ನು ನಾವು ‘ಜೇಬು ಪರಮಾಧಿಕಾರ’ ಎಂದು ಉಲ್ಲೇಖಿಸಿದರೆ ಆಭಾಸವಾಗುತ್ತದೆ. ಇಂಥ ಸಂದರ್ಭದಲ್ಲಿ ಇಂಗ್ಲಿಷ್ ಪದಗಳನ್ನೇ ಬಳಸಬೇಕು.

ಸಂಕ್ಷೇಪಾಕ್ಷರಗಳ ಮೂಲಕ ಸ್ಮರಣೆಯಲ್ಲಿ ಇಟ್ಟುಕೊಳ್ಳಿ:  ಆರಂಭದಲ್ಲಿ 395 ವಿಧಿಗಳು, 22 ಭಾಗಗಳು ಹಾಗೂ 8 ಪರಿಚ್ಛೇದಗಳನ್ನು ಹೊಂದಿದ್ದ ಭಾರತದ ಸಂವಿಧಾನ ಪ್ರಸ್ತುತ 103 ತಿದ್ದುಪಡಿಗಳ ಬಳಿಕ 448 ವಿಧಿಗಳು, 25 ಭಾಗಗಳು ಹಾಗೂ 12 ಪರಿಚ್ಛೇದಗಳನ್ನು ಹೊಂದಿದೆ. ಇವೆಲ್ಲವುಗಳನ್ನು ನೆನಪಿನಲ್ಲಿ ಇಟ್ಟುಕೊಳ್ಳಲು ನಿಮ್ಮದೇ ಆದ ಸಂಕ್ಷೇಪಾಕ್ಷರಗಳ ಬಳಕೆ ಉತ್ತಮ.

ಉದಾಹರಣೆಗೆ: ‘U Can Fly Directly From US’ ಎಂಬ ವಾಕ್ಯವನ್ನು ಸಂಕ್ಷೇಪಾಕ್ಷರವಾಗಿ ಬಳಸಿಕೊಂಡು ನೀವು- U- Union and it's Territory (ಒಕ್ಕೂಟ ವ್ಯವಸ್ಥೆ ಮತ್ತು ಅದರ ಅಂಗಗಳು- ಭಾಗ 1), Can- Citizenship (ಪೌರತ್ವ- ಭಾಗ 2), Fly- Fundamental Rights (ಮೂಲಭೂತ ಹಕ್ಕುಗಳು- ಭಾಗ 3), Directly- Directive Principles of State Policy (ರಾಜ್ಯ ನೀತಿ ನಿರ್ದೇಶಕ ತತ್ವಗಳು- ಭಾಗ 4), From- Fundamental Duties (ಮೂಲಭೂತ ಕರ್ತವ್ಯಗಳು- ಭಾಗ 4 ಎ), U- Union Government (ಕೇಂದ್ರ ಸರ್ಕಾರ- ಭಾಗ 5), S- State Government (ರಾಜ್ಯ ಸರ್ಕಾರ- ಭಾಗ 6) ಪರಿಕಲ್ಪನೆಗಳನ್ನು ನೆನಪಿನಲ್ಲಿ ಇಟ್ಟುಕೊಳ್ಳಬಹುದು.

ಗುಣಮಟ್ಟದ ಪುಸ್ತಕಗಳನ್ನು ಓದಿ
ಭಾರತದ ಸಂವಿಧಾನಕ್ಕೆ ಸಂ ಬಂಧಿಸಿ ಕೆಲವು ಗುಣಮಟ್ಟದ ಇಂಗ್ಲಿಷ್ ಹಾಗೂ ಕನ್ನಡ ಮಾಧ್ಯಮದ ಮೂಲ ಆಕರ ಗ್ರಂಥಗಳನ್ನು ಓದುವುದು ಒಳಿತು. Indian Polity- ಎಂ.ಲಕ್ಷ್ಮೀಕಾಂತ್, Introduction to Indian Constitution- ದುರ್ಗಾ ದಾಸ್ ಬಸು, Our Parliament- ಸುಭಾಷ್ ಕಶ್ಯಪ್, ಭಾರತದ ರಾಜಕೀಯ & ಸಂವಿಧಾನ - ಗಂಗಾಧರ ಪಿ.ಎಸ್., ಸಾರ್ವಜನಿಕ ಆಡಳಿತ - ಹಾಲಪ್ಪ... ಈ ಪುಸ್ತಕಗಳು ಕೆಲ ಉತ್ತಮ ಆಕರ ಗ್ರಂಥಗಳಾಗಿದ್ದು, ಇವುಗಳ ಜೊತೆಗೆ NCERT ಪಠ್ಯಕ್ರಮದನ್ವಯ ರಚನೆಗೊಂಡಿರುವ ಸಿಬಿಎಸ್‌ಇ ಹಾಗೂ ರಾಜ್ಯ ಪಠ್ಯಕ್ರಮದ ಸಮಾಜ ವಿಜ್ಞಾನ ಪಠ್ಯಪುಸ್ತಕಗಳ ಪೌರನೀತಿ ಭಾಗವನ್ನು ಕಡ್ಡಾಯವಾಗಿ ಓದಬೇಕು. ಇದಲ್ಲದೇ ಕನಿಷ್ಠ 10 ವರ್ಷಗಳ ಹಳೆಯ / ಮಾದರಿ ಪ್ರಶ್ನೆ ಪತ್ರಿಕೆಗಳ ಅವಲೋಕನ ಮರೆಯಬಾರದು.

(ಲೇಖಕರು: ನಿರ್ದೇಶಕರು, ಸ್ಲೇಟ್ ಸ್ಪರ್ಧಾತ್ಮಕ ಪರೀಕ್ಷೆಗಳ ತರಬೇತಿ ಕೇಂದ್ರ, ಧಾರವಾಡ)
(ಕೃಪೆ : ಪ್ರಜಾವಾಣಿ)